Ing Taman Tanpa Rembulan

Allief Normaz Billah

Dak waca layangmu

kang mau sore tumeka

nalikane angreronce wewayanganmu

kang dumadakan terwela kagawa

kekesing angin sore mangsa ketiga

isih ana taman iki kang dadi seksi

kala samana angrantu janji

tumekaning purnama sidi

aku lan sliramu sesandhingan

engga madyaning ratri

ora lila sajroning rasa

ing nalikane esuk tumeka

buyarake gedhene kahyuna

kamangka ingdalem sawengi

namung peteng lan arum ganda mlathi

kang angambar sajroning ati

ngetutke lumayune rodha

ninggalake taman gegandhengan

miyak rasa tumuju kisik segara

kembeng kaca kaca nalika

abot ngeculke tangan

kang keket gegondhelan

pamitan yen iki dina pungkasan

ewuh aya pambudiku ninggal rasa

lan kaca kaca purwa

binarung kidung asmara dahana

dumadakan mangsa sandya kala

layangmu tumeka

kandha yen isih tresna

Rembang, 16 September 2010



KENYA NINDYA ING WARNA

zamroni allief billah

lagi wae tumeka tega pamit lunga

mung sasuwene ambarengi candra

nanging arikalane abyor ing cahya

luwih sampurna tinimbang padhange rembulan

kang mung telung dina ing kasampurnan

durung pupus anggonku mandeng

saha cacedhakan marang sliramu

lan nalikane durung bisa ngrasaake

yen tekamu ing sandhingku kasunyatan

uga kangen ana dhadhaku iki ya temenanan

sliramu pamit arep bali

krana wus tumekane titi wanci

namung ninggalake arum ganda melati

sangsaya gawe sumendhal sajroning ati

dhuh... kenya kang nindya ing warna

kapan maneh anggonmu tumeka

nambani tatu kang ana dhadha

karana

mung esemmu kang bisa dadi

tamba sakehing lelara

Jombang, 8 September 2010

Er... : kangenku sakdurunge lungamu

NALIKA SEPI ....

NALIKA SEPI ....

pasuryanmu sing bening
tumiba ing banyu mili turut pletheking surya
saya suwe tansaya adoh
ninggalake sepi

tan ana sabawa gumrisiking alang alang
aku mung bisa nyawang
pasuryanmu sing kagawa banyu mili turut kali
nganti datan katon kasaput pedut ***

maymintaraga, jakarta 27 mei2009

UDAN WAYAH SORE

UDAN WAYAH SORE
maymintaraga 02 mei 2009

udan riwis-riwis nggawa angin gumanti
ora kaya nalika kang kawuri sing kebak pangarep-arep
dikaya ngapa lemah wus kebanjur teles

sesuk esuk yen sang surya wiwit sumunar
lan manuk kepodang colat-colot ana wit gedang
tak tunggu tekamu ing sak ngisore payung
tak kanthi lakumu tumeka ngendi

mbokmenawa sesuk sore wus ora udan riwis-riwis
marakake gawe kekesing ati
manuk kepodang wus mabur mangulon
nanging tetep tak tunggu tekamu ***

KEKUDANGANKU

o, ngger sang ponang jabang bayi
bebarengan tangismu kang kejer sumusup ing wengi
sira wus lahir kanthi slamet
nyawang gumelaring jagat raya

yen sira nangis tak emban lan tak tembangake dandang gula lingsir wengi
kapurih sira bisa turu kanthi tentrem
yen sira mesem tak kudang tak liling

o, ngger sang ponang jabang bayi
tak gadang dadiya wong kang luhur bebudenmu ing tembe ***

kanggo: fabian moreno setiawan lan rubi dirgantara

PUTRI KEMBANG PUTIH

putri kembang putih
ora tak lilani
tanganku agawe reget

aku tansah mulat salira

dimen sengsem
tak simpen nganti
akhiring jaman

tak gadang ing tembe
bakal ana tangan
sing methik
kembang putih
***
maymintaraga

TULISAN KANG BENER

Ana para sedulur priyayi Jawa yen nulis basa Jawa isih kurang mathuk.
Contone mangkene:

Tak jarwakake nganggo Bahasa Indonesia disik ya?
Kepriye yen nulis umpamane "Istriku sakit".
isih ana para sedulur nulise mangkene: "Bojoku loro". Lha rak dadi lucu ta iki? Tegese yen dijarwakake nganggo Bahasa Indonesia dadine : "istriku dua".

Sing bener ya sedulur panulisane mangkene: "Bojoku lara". Pancen angel cara panulisan Jawa nganggo aksara latin iku.

Ora kabeh pocapan "o" ditulis "a". umpamane "bothok", "keplok", "simbok"jenggot" lsp. Ora ditulis:
"bathak", "keplak", "simbak", "jenggat".
pancen ora ana angger-angger sing baku. Mila ya kudu mikir-mikir disik yen arep nulis basa Jawa nganggo aksara latin.

Wasana mugi andadosaken kawuningan. Nuwun. ***

NALIKA UDAN DERES

udan deres sore kang nelesi gegodongan

aweh berkah kang lagi nandang garing

sawentara nambahi kekes sing kebanjiran

udan februari iki aweh nasib maneka warna

ing bandung sisih kidul para mitra ngekep dengkul

banjir saknduwuring wentis mrusuh

bandung sing nate dadi segara geni

saiki dadi segara banyu kang buthek

udan deres sore iki tak sawang lumantar jendela

cipratan banyu nelesi kaca mbaka siji mili ndlidir

geneya aweh nasib sing ora pada

apa iya bengi iki udan deres maneh?

mendung wis kandel gumantung ana langit. ***

KEMBANG EDELWEISS

pedut adem kekes ora rinasa
kala mangsa ratri peteng dedet lelimengan
ing kene panggonanmu
kembang edelweiss kang mekar langgeng

dudu ana ing pot ruang tamu panggonanmu
nanging ana ing puncaking arga

endahmu kang langgeng tak ripta lumantar gurit
kanggo pangeling yen aku nate jumangkah
mecaki ereng-ereng arga

edelweiss kembang arga kang langgeng
kaya langgenging impenku nalika ketemu sliramu ***

ING PUCUKING CEMARA

kanggo puput

kedeping netramu diajeng,
esem angujiwat tansah nambani tatu
nanging geneya sliramu tansah ana ing saknduwuring lintang
tanganku ora sranta anggayuh

wicaramu kang kenes diajeng
tansah ngelipur ati kang ngandut duhkita
ora ketang sak panginang suwene

ganda arum rikmamu diajeng
tansah ndudut ludira lanangku
kagawa tekan impen
geneya
esemmu tansah ana pucuking cemara
kang obah katiuping samirana
kaya nyapu langit wengi ***

WAYAH ESUK ING PRAPATAN

Jakarta, 17 Februari 2010

simbok bakul pada lungguh jejer
kabeh ditawakake
sing tuku ambanyu mili
ing pinggir prapatan wayah esuk
tansah ana pangarep-arep

udan riwis-riwis mangsa bodo
dibelani toh pati
kanggo jejege urip
caping lan payung godong gedang
aja tansah mulat udan sing marakake keset

tumandang lungguh jejer ana pinggiring prapatan
kapurih aja nganti anak keluwen ***